Abşeron rayonunda 9 ayının sosial-iqtisadi inkişafının yekunları və qarşıda duran vəzifələrə həsr olunmuş geniş iclas keçirilmişdir

Prezident İlham Əliyevin sədrliyi ilə Nazirlər Kabinetinin 2014-cü ilin 9 ayının sosial-iqtisadi inkişafın yekunlarına və qarşıda duran vəzifələrə həsr olunmuş geniş iclasında dövlətimizin başçısının nitqindən irəli gələn vəzifələr Abşeron Rayon İcra Hakimiyyətinin başçısı yanında şuranın iclasında ətraflı müzakirə olunub.

İclasda bu ilin 9 ayı ərzində rayonda əldə olunan uğurlardan danışılıb, qarşıda duran məsələlər barədə fikir mübadiləsi aparılıb.
Qeyd edilib ki, bu ilin 9 ayı hər yerdə olduğu kimi, Abşeron rayonunda da mühüm layihələrin icrası davam etdirilib, qarşıya qoyulan bütün tapşırıqlar vaxtında və keyfiyyətlə icra edilib. Vurğulanıb ki, ötən 9 ayda 2424 yeni iş yeri açılıb. Ötən ilin doqquz ayının nəticələri ilə müqayisədə sənaye məhsulunun, nəqliyyat sektorunda yük daşınmasının, pərakəndə əmtəə dövriyyəsinin, əhaliyə göstərilən pullu xidmətlərin və tikinti-quruculuq işlərinin həcmi ötən ilin müvafiq dövrü ilə müqayisədə xeyli artıb.

Diqqətə çatdırılıb ki, cari ilin əvvəlindən rayonun iqtisadi və sosial sahələrinin inkişafı üçün maliyyə mənbələrindən əsas kapitala 247 milyon 389 min manat investisiya yönəldilib. Hesabat dövründə Prezident İlham Əliyevin müvafiq Sərəncamı ilə Masazır- Saray- Novxanı və Hökməli- Qobu- Lökbatan- Güzdək- Puta avtomobil yolları tikilərək istismara verilib. Xırdalan şəhərində Heydər Əliyev prospekti müasir görkəmdə yenidən qurulub, Həsən Əliyev küçəsi isə genişləndirilərək abadlaşdırılıb.
Şura iclasında bildirilib ki, Bakı-Quba və Bakı-Şamaxı avtomagistrallarının rayon ərazisindən keçən hissəsinin kənarlarında abadlaşdırma işləri həyata keçirilərək qazon, ağac və gül kolları əkilib.
Hesabat dövründə əhalinin su, elektrik enerjisi və “mavi yanacaq”la daha keyfiyyətli təmin edilməsi istiqamətində mühüm işlər görülüb. Rayon ərazisində müxtəlif gücə malik 13 yeni transformator quraşdırılıb, yeddisi təmir edilib, 1337 paqonmetr uzunluğunda yeni qaz kəməri çəkilib, 3498 ədəd "Smart- kart" tipli sayğac quraşdırılıb.

Qeyd edilib ki, yeni tədris ilində Abşeron rayonunda 2 yeni məktəb binası və 2 məktəb üçün yeni tədris korpusu istifadəyə verilib. Həmçinin hesabat dövründə yüksək zövqlə və xüsusi memarlıq üslubunda inşa edilən Heydər Əliyev Mərkəzi, Bayraq meydanı, ”Park Abşeron” əyləncə mərkəzi, Xırdalan Şəhər Musiqi Məktəbi, Şahmat məktəbi, rayonunun Masazır qəsəbəsində 13 min tamaşaçı tutumlu beynəlxalq standartlara uyğun stadion istifadəyə verilib. Sakinlərin mənalı istirahəti və asudə vaxtlarını səmərəli keçirmələri üçün 12 hektar ərazini əhatə edən Heydər Əliyev adına mədəniyyət və istirahət parkında hər cür şərait yaradılıb.
Yığıncaqda çıxış edən rayonun idarə, müəssisə və təşkilatlarının rəhbərləri tikinti, kənd təsərrüfatı, yol infrastrukturunun bərpası və inkişaf etdirilməsi, küçə və yolların abadlaşdırılması, yaşayış məntəqələrinin, xüsusilə Xırdalan şəhərinin müasirləşməsi istiqamətində görülən işlər haqqında geniş məlumat veriblər.
Tədbirdə çıxış edən rayon ziyalıları Abşeronda geniş vüsət alan quruculuq və abadlıq işlərinə görə Prezident İlham Əliyevə minnətdarlıqlarını bildiriblər