Abşeronda Şuşalı şəhid ailələri ilə görüş keçirilib

Şuşa şəhərinin 1992-ci il 8 may tarixində işğalı ilə əlaqədar olaraq Abşeron rayonunda məskunlaşan Şuşalı şəhid ailələri ilə görüş keçirilib. Abşeron rayon İcra Hakimiyyətində baş tutan görüşdə Azərbaycanın bütövlüyü uğrunda qəhrəmancasına döyüşərək şəhid olan hərbçilərimizin əziz xatirəsi bir dəqiqəlik sukutla yad edilib.

Tədbirdə Rayon İcra Hakimiyyətinin başçısı İradə Gülməmmədova çıxış edərək, hər il Azərbaycanın şəhər və rayonlarının işğal günlərində həmin bölgələrdən olan şəhid ailələri ilə gürüşlərin keçirildiyini, bunun da məqsədinin işğal altında olan ərazilərimizin təbliğ edilməsi, gəclərimizin vətənpərvərlik ruhunda böyüdülməsi, onların unudulmamasına çalışmaq, şəhid ailələrinə dövlət qayğısı göstərmək olduğunu bildirib.

İşğal altında olan ərazilərimiz, o cümlədən Şuşa şəhəri haqqında danışmağın hamı üçün ağrılı olduğunu vurğulayan İ.Gülməmmədova Şuşanın Azərbaycan tarixində, mədəniyyətində mühüm əhəmiyyət kəsb etdiyini bildirib. Azərbaycanda ilk pul sikkələrinin, ilk məktəbin məhz Şuşada yaradıldığını vurğulayan başçı bu qala şəhərinin mədəniyyət beşiyi olmaqla yanaşı elmi mərkəz funksiyasını da yerinə yetirdiyini söyləyib. Sovet İttifaqı dönəmində Şuşanın tarixinin bilərəkdən saxtalaşdırıldığını, onunla bağlı olan həqiqətlərin məqsədli şəkildə insanlara çatdırılmadığını vurğulayan İ.Gülməmmədova qeyd edib ki, o zamanlar da bu şəhərimizin maddi-tarixi abidələri, sənət əsərləri gizlincə daxıdılıb, talanıb və məhv eilib.

Düşmən tapdağında olan torpaqlarımızın işğal altından azad edilməsi istiqamətində dövlət tərəfindən uğurlu siyasət aparıldığını qeyd edən başçı bildirib ki, cənab prezident, Ali Baş Komandan İlham Əliyevin rəhbərliyi ilə çox tez bir zamanda biz öz dədə-baba yurdlarımıza qayıdacağıq. Prezident İlham Əliyevin işğala məruz qalan ərazilərimizin sülh yolu ilə geri qaytaramağa çalışdığını, lakin bu mümkün olmadıqda hərbi yolla rayonlarımızın azad ediləcəyini vurğulayan başçı əlavə edib ki, biz hər birimiz o günə hazır olmayıq.

Daha sonra Şuşadan olan şəhid ailələri Solmaz Mirzəyeva, Təranə Mirzəyeva torpaqlarımızın tezliklə azad ediləcəyinə, məcburi köçkünlərin ata-baba yurdlarına dönəcəklərinə inandıqlarını bildirərək onlara göstərilən qayğı və diqqətə görə minnətdarlıqlarını bildiriblər.

Sonda şəhid ailələrinə maddi yardımlar göstərilib.