Abşeronda inzibati ərazi dairələri üzrə təsərrüfatbaşına uçot sənədlərinin tətbiqinə dair zona müşavirəsi keçirilib
Xırdalan şəhərində kənd inzibati ərazi dairələri üzrə təsərrüfatbaşına uçot sənədlərinin tətbiqinə dair zona müşavirəsi keçirilib. Abşeron rayon İcra Hakimiyyətinin və Dövlət Statistika Komitəsinin təşkilatçılığı ilə keçirilən tədbirdə Rayon İcra Hakimiyyətinin başçısı İradə Gülməmmədova, DSK sədri Tahir Budaqov, Azərbaycan Respublikası Prezidenti Administrasiyasının məsul işçisi Dəyanət Abdullayev, eləcə də Abşeron, Qubadlı, Zəngilan və Xızı rayonlarının yerli icra hakimiyyəti başçılarının aidiyyəti müavinləri, kənd inzibati ərazi dairələri üzrə nümayəndələri, yerli statistika orqanlarının rəhbərləri, uçot sənədlərinin aparılmasına məsul olan şəxslər iştirak edib. Müşavirənin keçirilməsinin başlıca məqsədi Dövlət Statistika Komitəsi tərəfindən hazırlanmış yeni təsərrüfatbaşına uçot sənədlərinin tətbiqi və aparılması ilə bağlı məsul şəxslərin təlimatlandırılması olub.
Tədbir iştirakçıları əvvəlcə xalqımızın ümummilli lideri Heydər Əliyevin Xırdalan şəhərində ucaldılan abidəsi önünə gül dəstələri düzülərək əziz xatirəsi ehtiramla yad ediblər. Sonra Heydər Əliyev Mərkəzi ziyarət olunub, burada sərgilənən və ümummilli liderin həyat və fəaliyyətinin müxtəlif dövrlərini əks etdirən fotolar və eksponatlarla tanış olublar.
Zona müşavirəsində çıxış edən Abşeron rayon İcra Hakimiyyətinin başçısı İradə Gülməmmədova tədbirin əhəmiyyətini qeyd edərək rayon haqqında ətraflı məlumat verib. Abşeronda rəsmi olaraq 280 min əhalinin qeydə alındığını, lakin qeyri-rəsmi olaraq 500 minə yaxın sakinin yaşadığını, 8 qəsəbə, 6 kənd və bir şəhərdən ibarət olduğunu vurğulayan başçı rayonun həm kənd təsərrüfatı, həm də sənaye sahəsi üzrə mərkəzləşdiyini bildirib. Rayon ərazisində yaşayan əhalinin və eləcə də, kənd təsərrüfatrı torpaqlarının yenidən qeydiyyatının aparılmasının vacibliyini qeyd edən İ.Gülməmmədova bunun ölkənin ərzaq təhlükəsizliyinin təminatında mühüm əhəmiyyət kəsb etdiyini bildirib.
Sonra çıxış edən DSK sədri Tahir Budaqov bildirib ki, Azərbaycan Respublikasının Prezidenti cənab İlham Əliyevin ölkənin bütün iqtisadi sahələri, o cümlədən kənd təsərrüfatı üzrə statistik uçotun təkmilləşdirilməsi ilə bağlı tapşırıqlarına uyğun olaraq Dövlət Statistika Komitəsi tərəfindən zəruri islahatlar həyata keçirilir, beynəlxalq təcrübə öyrənilərək statistika sisteminin inkişafı üçün müvafiq tədbirlər görülür. Bu istiqamətdə aparılan irihəcmli işlərdən biri də kənd təsərrüfatı statistikasının təşkili üçün mühüm informasiya mənbəyi olan və kənd yaşayış məntəqələri üzrə hər bir təsərrüfat haqqında geniş məlumat almaq imkanı verən təsərrüfatbaşına uçot sənədlərinin təkmilləşdirilməsidir. Belə ki, 1934-cü ildən ciddi dəyişiklik edilmədən tətbiq olunan “Təsərrüfatbaşına kitab” və digər uçot formaları hazırlanarkən göstəricilər sistemləşdirilib, bir çox uyğunsuzluqlar aradan qaldırılıb, eyni zamanda əhalinin ərzaq təhlükəsizliyinin təminatında strateji əhəmiyyəti olan məhsullara dair yeni məlumatların əldə olunması zərurəti nəzərə alınıb.
Qeyd olunub ki, yeni uçot sənədlərinin vaxtında və yüksək keyfiyyətlə tətbiq edilməsi kənd təsərrüfatının və ölkə iqtisadiyyatının inkişafına dair qərarların qəbulu üçün dəqiq məlumatların hazırlanmasına imkan verəcək, hər bir təsərrüfat üzrə məlumatların toplanması dövlət dəstəyinin daha ünvanlı şəkildə göstərilməsinə yardım edəcək, məlumatların birbaşa mənbədən əldə edilməsi ölkə əhalisinin ərzaq məhsulları ilə təminat səviyyəsinin daha ətraflı öyrənilməsinə xidmət edəcək, rəqabət qabiliyyətli məhsulların müəyyən olunmasına, ölkənin ixracat potensialının qiymətləndirilməsinə nail olunacaq.
Azərbaycan Respublikası Prezidenti Administrasiyasının məsul işçisi Dəyanət Abdullayev də ölkədə aparılan islahatlardan danışaraq, statistik uçotun təkmilləşdirilməsinin əhəmiyyətini vurğulayıb.
